Хөрмәткә лаек кеше ул

Камил Хәбир улы Фатыйхов белән мин күптәннән таныш. Түбән Кама аксакаллар шурасында бергә эшлибез. Ул шура рәисе булганда, аңа соклана идем. Барыбызга караганда яшьрәк булса да, таләпчәнлеге, күпкырлы белеме, кешеләргә карата яхшы мөнәсәбәте һ.б. белән үрнәк булды. Яшермим, гомер юлымда аның кебек кешеләрне сирәк очраттым. Ирексездән, каян килгән бу кешегә шундый яхшы сыйфатлар, дигән сорау туа.

Әтисе Бөек Ватан сугышының беренче көннәреннән үк фронтка китеп, Гомель шәһәре янында хәбәрсез югалганда, Камил әле әнисенең карынында була. Ул 1942 елның февралендә туган. Әтисе сугышка киткәндә әйтеп калдырган үтенечне истә тотып, малайга Камил дип исем кушканнар.

Сугыш еллары баласына нинди михнәтләр күрергә туры килгәнен, үзем дә шул чорда яшәгән кеше буларак, бик яхшы аңлыйм. 12 яшендә, җәйге каникул вакытында, ат җигеп колхозда эшли.15 яшендә тракторда сабанчы, комбайнчы ярдәмчесе булып гаиләгә ярдәм итә. Алты баланы аякка бастыру өчен әнисенә никадәр кыен икәнлеген, яшь булса да, бик яхшы аңлый ул. Көченнән килгәнчә аңа булышырга тырыша.

Мәктәптә укыганда математикага көчле булган егет Канаш финанс техникумына укырга керә. 1962 елда техникумны тәмамлагач, аны Чистай район финанс бүлегенә икътисадчы итеп җибәрәләр. Җитәкчеләр аның үз эшен төгәл башкаруын күреп, Казан финанс-икътисад институтына читтән торып укырга керергә киңәш бирәләр. Камил шулай эшли дә. Ә тиздән ул армия сафларына китә. Монысы да аның кечкенәдән үк килгән хыялы була. Армиягә алмаслар дип куркып, физкультура һәм спорт белән тырышып шөгыльләнә, сәламәтлеген ныгыта. Хәрби, хезмәттә дә сынатмый егет - Мактау кәгазьләре, бүләкләр алып, кайта. Чистайда эшләргә бик кыстасалар да, 1966 елда Түбән Камага килеп, финанс бүлегендә өлкән икътисадчы булып эшли башлый.

Шәһәребез җитәкчелеге, яшь белгечнең сәләтле һәм белемле булуын күреп, аны, КПССның шәһәр комитетына инструктор итеп күчерәләр. Аннан соң «Татэнергострой»да һәм «Шин» берләшмәсендә төрле җаваплы урыннарда эшли. Ә 1985 елдан шәһәр финанс бүлеген җитәкли. Кайсы гына тармакта эшләмәсен, тирән белемле, югары квалификацияле белгеч буларак, башкаларга үрнәк була.

Фатыйхов лаеклы ялга чыккач та кул кушырып утырмый, 2003 елда аны аксакаллар шурасы рәисе итеп сайлыйлар. Бу вазифаны 2009 елда сәламәтлеге какшау сәбәпле азат итүләрен сораганчы башкарды. Әле хәзер дә шураның иң актив әгъзасы. Ул тугрылыклы гаилә башлыгы, акыллы һәм таләпчән ата да әле. Алар хатыны Светлана белән ике бала үстереп, олы тормышка аяк бастырдылар.

Менә шундый олы хөрмәткә лаек кеше ул - шушы көннәрдә 70 яшен тутырачак Камил Хәбирович.