Түбән Каманы әйләнеп узу юлының икенче этабында асфальтобетон җәю төгәлләнде

Түбән Кама һәм Яр Чаллы шәһәрләрен әйләнеп узу юлының икенче этабында асфальтобетон җәю эшләрен төгәлләделәр.

Төп төзелеш эшләре Түбән Кама һәм Чаллы шәһәрләрен урап уза торган 26-55 км участокта башкарылган. Әлеге этапта төзелешкә юлчылар 2022 елның гыйнварында керештеләр.

Белгечләр җир эшләрен башкарган, «юл киеме»нә нигез салганнар һәм асфальтобетон өслек түшәгәннәр, дип хәбәр итә «Волго-Вятскуправтодор» ФКУ матбугат хезмәте.

Хәзер белгечләргә автомобиль юлын төзекләндерү — электр яктырту линияләрен, барьер киртәләрен, юл билгеләрен, тавыштан саклаучы экраннарны һәм кыргый хайваннардан саклаучы киртәләрне төзеп бетерәсе калды.

Искәртәбез, урап узу юлы төзелешен 2024 ел ахырына кадәр тәмамларга планлаштыралар.