Түбән Камада студентлар арасында иң яхшы машина йөртүчеләрне ачыкладылар

Чараны шәһәр дәүләт автоинспекциясе, «Юл хәрәкәте иминлеге» учреждениесенең Түбән Кама бүлеге һәм яшьләргә ярдәм итү үзәге оештырды.

Анда югары һәм урта махсус уку йортлары студентлары катнашты. Аларга үзләренең юл хәрәкәте кагыйдәләрен белүләрен күрсәтергә, теоретик имтихан узарга, шулай ук машина йөртү осталыгын күрсәтергә кирәк иде.

Ярышлар йомгаклары буенча команда зачетында Түбән Кама транспорт инфраструктурасы көллияте лидер булды, икенче урынны Бөтенроссия дәүләт юстиция университеты филиалы алды, өченче урынны Түбән Кама медицина көллияте яулады.

Шәхси зачетта урыннар түбәндәгечә бүленде:

• 1 урын — Тимур Шәрәфиев (Түбән Кама транспорт инфраструктурасы көллияте);
• 2 урын — Роман Кырганов (Түбән Кама транспорт инфраструктурасы көллияте);
• 3 урын — Иван Еремин (Бөтенроссия дәүләт юстиция университеты филиалы).

Конкурста катнашучыларның барысына да истәлекле бүләкләр һәм яшьләргә ярдәм итү үзәгеннән сертификатлар тапшырылды.