Түбән Камада районара торак инспекциясенең яңа башлыгын тәкъдим иттеләр

Татарстан Дәүләт торак инспекциясе башлыгы Александр Тыгин һәм шәһәр мэры Рамил Муллин дүшәмбе киңәшмәсендә Түбән Кама районара торак инспекциясенең яңа җитәкчесен — Алмаз Гыйззәтуллинны тәкъдим иттеләр.

Элегрәк ул Түбән Кама муниципаль районы Советы аппаратын җитәкләгән.

«Ул стажировканы Чаллыда үтте. Без үзебез өчен шундый форма сайладык: башта эре инспекциядә белгечне «тикшерәбез», аннары билгелибез. Бер генә үтенеч — яратырга һәм ярдәм итәргә», — диде Александр Тыгин.

Моңа кадәр әлеге вазифаны башкарган Наилә Ихсанова Түбән Кама торак инспекциясендә 1997 елның 1 июленнән — нигез салынганнан бирле эшләгән, 2003 елда җитәкче булган. Бүген киңәшмәдә Наилә Ихсановага Дәүләт бүләге, «Фидакарь хезмәт өчен» медале, шулай ук Түбән Кама муниципаль районы башлыгының рәхмәт хаты тапшырылды.