Түбән Камада йортларга җылы бирү башланды

Түбән Камада ягу сезонына рәсми рәвештә старт бирелде. Узган атнадан социаль әһәмиятле объектларга җылы бирү башланган иде. 172 учреждениегә җылы бирелде.

Бу хакта кичә «эшлекле дүшәмбе»дә хәбәр иттеләр. Кичәдән күпфатирлы йортларда да температура күтәрелә башлады.

«Бүгенге көннән торак йортларга җылылык бирү башлана — бу Түбән Кама районында 1013 йорт. 7 көн дәвамында җылылык бирү планлаштырыла», — дип ачыклык кертте Түбән Кама муниципаль районы башкарма комитеты җитәкчесенең ТКХ буенча урынбасары Максим Парамонов.