Түбән Камада «Ел укытучысы» конкурсы башланды

Түбән Камада ел саен үткәрелә торган «Ел укытучысы» һөнәри осталык конкурсының муниципаль этабы старт алды. Бу хакта Түбән Кама районы мәгариф идарәсе җитәкчесе Айдар Гарифуллин хәбәр итте.

«Елдан-ел педагоглар үзләренең профессиональ осталыкларын раслыйлар, балалар белән хезмәттәшлек итүнең яңа ысулларын эшлиләр; бу, барыннан да элек, мәктәп коллективының эш системасы һәм һәр укытучы-конкурсантның җитди әзерлеге; коллегалар белән зур тәҗрибә уртаклашу һәм башка мәктәпләрдән укытучылар белән очрашу, аралашу мөмкинлеге. Барлык катнашучыларга уңышлар телибез!» — дип билгеләп үтте җитәкче.