Татарстанстат: Республикада реаль хезмәт хаклары 11,8 процентка арткан

2024 елның беренче дүрт аенда Татарстан предприятиеләре һәм оешмалары хезмәткәрләренең, шул исәптән кече эшмәкәрлек субъектларының реаль хезмәт хакы 2023 елның шул ук чоры белән чагыштырганда 11,8 процентка арткан. Бу хакта Татарстанстат республиканың социаль-икътисади үсеше турында доклад әзерләгән, дип яза «Татар-информ».

Гыйнвар-апрель айларында уртача айлык номиналь хезмәт хакы 67 458,4 сумны тәшкил иткән — узган елның беренче дүрт ае белән чагыштырганда 20,1 процентка арткан.

Шул ук вакытта апрель аен аерым алып караганда татарстанлыларның реаль хезмәт хакы елына карата 10,5 процентка арткан, ә аена карата 3,9 процентка кимегән.