Татарстанда Түбән Кама чикләрен үзгәртү турында закон кабул ителде

6 июньдә Татарстан Дәүләт Советы утырышында депутатлар Түбән Кама һәм Прости авыл җирлеге чикләрен үзгәртү турында закон проектын кабул иттеләр.

Проект һәм картографик материаллар республиканың киңлек мәгълүматлары фонды белгечләре тарафыннан әзерләнгән.

Документ нигезендә, 2 212 гектар мәйданлы шәһәр территориясенең бер өлеше Прости авыл җирлеге составына кертеләчәк. Бу Түбән Кама муниципаль районы чикләрендә «Этилен 600» индустриаль паркын урнаштыру, шул исәптән Түбән Кама шәһәре территориясендә махсус икътисади зона булдыру өчен эшләнә, чөнки закон буенча махсус икътисади зона алдынгы үсеш территориясе составына керә алмый.