Путин эшләүче пенсионерларның пенсиясен индексацияләүне яңарту турында закон имзалады

Россия Президенты Владимир Путин эшләүче пенсионерларның пенсиясен индексацияләүне яңарту турында законны имзалады. Документ хокукый актлар рәсми порталында чыккан, дип хәбәр итә «Татар-информ».

Дәүләт Думасы 26 июньдә законны кабул итте, ә Федерация Советы аны 3 июльдә хуплады. Яңа закон киләсе, 2025 елның 1 гыйнварыннан гамәлдә була.

Эшләүче пенсионерлар иминият пенсиясен һәм аңа 2024 елның 31 декабренә билгеләнгән (алынмаган акчаларны исәпләмичә) фиксацияләнгән түләү алачак, элегрәк ул билгеләнгән, әмма пенсионер эшеннән киткәнче түләнмәгән була. Индексация суммасы исәпләгәндә, элеккеге барлык индексацияләр, башка төзәтмәләр һәм киредән исәп-хисап ясаулар исәпкә алыначак.

Алга таба эшләүче пенсионерларга каралган түләүләр, эшләүдән туктаган пенсионерларныкы белән беррәттән ел саен индексацияләнәчәк.

Россия Хөкүмәтендә исәпләүләренчә, эшләүче россиялеләрнең уртача пенсиясе 1,3 мең сумга артачак. Инициативаны гамәлгә ашыру 2025 елда 96,45 млрд сумга, 2026 елда 177,03 млрд сумга, ә 2027 елда 260 млрд сумга төшәчәк. Дәүләт Думасы Рәисе Вячеслав Володин билгеләп үткәнчә, эшләүче пенсионерларга пенсияләрне индексацияләү турындагы закон 7,87 млн кешегә кагылачак.