Татарстанда атна ахырында +17 градуска кадәр җылы булачак

Синоптиклар атна ахырына Татарстанда шактый җылы һава торышын фаразлый.

Алдагы ике көндә республикада октябрьнең салкын һава торышы сакланачак. 

14 октябрьдә төнлә термометр баганалары +1дән +6га кадәр күрсәтәчәк, көндез һава +7..+12 градуска кадәр җылына. Төнге сәгатьләрдә көнчыгыш районнарда урыны белән бераз яңгыр явачак. Көндез явым-төшем ихтималы аз.

Якшәмбе көнне республикага җылы һава торышы киләчәк. Төнлә +2..+7 генә булса, көндез һава +12..+17 градуска кадәр җылыначак. Бераз яңгыр явуы ихтимал, дип фаразлый метеорологлар.

ТР Гидрометеоүзәге фаразлары буенча, дүшәмбе, 16 октябрьдә көндез шулай ук +12дән +17гә кадәр көтелә, ә сишәмбе көнне инде +8..+13кә кадәр суытачак. Барысына да яңгыр һәм көчле җил китерәчәк салкын атмосфера фронты гаепле.