Сәламәт ир – сәламәт милләт

Гадәттә, ирләр 50 яшьтә үк үзләрен начар хис итә башлый. Әмма табиблар фикеренчә, проблемалар күпкә иртәрәк килеп чыга. Сәбәпләре күп: дөрес тукланмау, начар гадәтләр, стресс... Табиблар сәламәт булу кагыйдәләре турында сөйләде, авыруны башлангыч чорында ничек күрергә икәнен аңлатты. 
Үзәк хастаханә баш табибы Хабибулла Ахмедов ирләргә ярдәм бик кирәк, дип саный. «Хатын-кызлар консультацияләре бар, ә ирләр өчен махсус медицина учреждениеләре юк. Шуңа күрә без болар барысы да үзара бәйләнгән булуы турында искәртеп торырга тиешбез. Сәламәт ирләр күбрәк булган саен, милләт тә, дәүләт тә сәламәт булачак. Бу чараны шуларны аңлату максаты белән уздырдык», – дип аңлатты ул.
50 яшьтән узган һәр икенче ирдә җенес бизенең ялкынсынуы – аденома табыла. Ел саен 1500 га якын түбәнкамалы рак авыруына шик белән хастаханәгә исәпкә куела. Инсульт һәм инфаркт та ирләрдә еш күзәтелә. Гомумән, алар ешрак һәм озаграк чирли. Ни өченме? Чөнки табибка сирәк күренә, хастаханәгә каты авырганда гына килә яки «Ашыгыч ярдәм» белән китерелә.
«Хатын-кызлар ирләрен, әтиләрен, улларын хастаханәгә алып килеп, холестериннарын, шикәр күләмен, кан басымын тикшертерләр дип өметләнәбез», – ди штаттан тыш баш кардиолог, баш табиб урынбасары Йөзем Хәмидуллина.  
Алсу ЮМАТОВА, Түбән Кама үзәк дәваханәнең җәмәгатьчелек белән элемтәләр буенча белгеч. 
Фотода: флешмоб мизгеле.
Автор фотосы.