Ял итү өчен уңайлы урын

Бу – республика программасы кысаларында тормышка ашырылучы проект. Программа нигезендә, агымдагы елда Түбән Кама муниципаль районына барлыгы 135 млн сум акча бүлеп бирелгән. Ул Кама Аланы поселогында – экопарк, Олы Афанас авылында паркның беренче этабын эшләүгә, «Кама» пляжын киңәйтүгә, шулай ук автошәһәрчекне яңартуга тотылган. Әлеге төзелеш эшләренең күп өлеше тәмамланган, ә калган өлеше киләсе елның язында дәвам итәчәк.
Үзгәртеп төзү нәтиҗәсендә, автошәһәрчек үзенең мөмкинлекләрен шактый киңәйткән. Хәзер ул якын-тирә микрорайоннарда яшәүчеләргә ял итү өчен заманча уңайлы урынга әверелгән. Автошәһәрчектә зур Яңа ел мәйданчыгы да булдырылачак.
Яңа территориядә велосипедчыларга аерым игътибар биреләчәк. Бу автошәһәрчекнең исеменнән дә ачык чагыла. «Безнең максат –  велокультураны югарырак дәрәҗәгә күтәрү», – дип аңлатты Айдар Метшин.