Түбән Камада яңа завод төзеләчәк

Түбән Кама районында терефталь кислотасы һәм ТАНЕКО мотор ягулыкларының биокомпонентлары җитештерү заводы төзү планлаштырыла.
Тиешле проект Татарстан Республикасы Инвестиция советы тарафыннан 13 октябрьдә җомга көнне узган утырышта хупланды, дип хәбәр итә ТР Рәисенең матбугат хезмәте. Бу инвестиция проекты кысаларында шулай ук складлар һәм товар парклары төзү күздә тотыла.

Яңа җитештерүгә 91,2 млрд сумнан артык акча җәлеп ителәчәк. Проект биш ел эчендә гамәлгә ашырылачак дип фаразлана.

Бу көнне ТР Инвестицияләр советы 109,3 млрд сум инвестицияләр белән 8 проектны хуплады.