Түбән Камада август ахырында гомумшәһәр өмәләре үткәреләчәк

23 августтан 25 августка кадәр Түбән Камада предприятиеләр катнашында гомумшәһәр өмәләре уздыру планлаштырыла.

Әлеге чаралар шәһәр территорияләренең санитар-экологик торышын яхшырту максатыннан үткәреләчәк, дип хәбәр итте шәһәр башкарма комитеты җитәкчесе Камил Нәҗмиев «эшлекле дүшәмбе» дә.

Җитәкче сүзләренчә, йорт яны территорияләрен һәм кеше күп йөри торган урыннарны тәртипкә китерергә, шулай ук урам-юл челтәренең беркетелгән территорияләрен үсентеләрдән, чүп-чардан һәм реклама продукциясеннән чистартырга кирәк. Ул теләге булган һәркемне өмәләрдә катнашырга һәм ишегалларында да, яшелләндерелгән территорияләрдә дә җыештыруны оештырырга чакырды.

«Без барыбыз да бер шәһәрдә яшибез. Аның чиста, матур һәм уңайлы булуын телибез!», — диде Камил Нәҗмиев.