Түбән Камада 20 сентябрьгә кадәр 17 км торбаны алыштырачаклар

Түбән Кама мэры Рамил Муллин хәбәр иткәнчә, 20 сентябрьгә кадәр шәһәрдә иң тузган 17 чакрым торба алыштырылачак һәм 35 ЦТП ремонтланачак. Шәһәр башлыгы үзенең телеграм-каналында торба үткәргечнең ремонтлана торган участокларының берсеннән видео урнаштырды.

«17 километр озынлыктагы иң таушалган торбаларны быел җәй көне үк алыштырырга карар кылынды: 12се — җылылык трассалары, 5е — кайнар су белән тәэмин итү. Моннан тыш, 35 ЦТП ремонтлыйбыз, шуларның 15ендә технологик җайланмаларны алыштырачакбыз. Эшләрне 20 сентябрьгә кадәр тәмамлыйбыз», — диелә язмада.

Шәһәр җылыту челтәрләрен һәм кайнар су белән тәэмин итүне яңарту буенча гомуми эш күләме зур: 500 км һәм 250 км. Әмма «Татэнерго» ның төгәл эш планы бар, дип ассызыклый мэр.

«Яңа команда нәрсә эшләргә кирәклеген аңлый һәм план буенча эшли: диагностика үткәрә, шәһәр җылыту сезонына тыныч керсен өчен иң искергән участокларны тәртипкә китерә. Киләсе язда проект институтларыннан аналитика алачакбыз. Бу безгә хәл итү ысулларын яхшырак аңларга ярдәм итәчәк», — дип сөйләде Түбән Кама мэры.

«Хөрмәтле түбәнкамалылар, мин һәр комментарийны укыйм һәм сусыз калганнарның ачуын да аңлыйм. Без бу проблеманы һичшиксез хәл итәчәкбез», — дип вәгъдә итте Рамил Муллин.