20 апрельдә Түбән Камада агач утырту башлана

20 апрельдән Түбән Камада агачлар утырту буенча зур күләмле эш башланачак. Бу хакта «эшлекле дүшәмбе» дә шәһәр башлыгы Рамил Муллин хәбәр итте.

«Күбрәк ылыслы агачларны утыртырбыз дип килештек.<...> Соңгы ике ел коры булды, шуңа күрә бездә күп кенә агачлар үсеп китә алмады, шуңа күрә быел бу агачлар урынына яңаларын утыртуны сорыйм. Һәм, әлбәттә, су сибүне оештыру бик мөһим, утырту белән генә эш бетми, ишегалларында да бу агачларны карарга мөмкинлек табарга кирәк», — дип ассызыклады мэр.

Агачларны утырту 15 майга кадәр дәвам итәчәк.

Моңа кадәр без 32 нче гимназиянең Әтиләр советы чыршылар утырту буенча экологик акция оештырды дип язган идек.