Түбән Камада балыкчы суга батып үлгән

14 август иртәсендә Түбән Кама районындагы «Шинник» базасы янында 65 яшьлек ир-ат батып үлгән.

Һәлакәт турындагы хәбәр 5:14 тә килә. Шалтыратучының сүзләренә караганда, ир-ат дуслары белән иртәнге сәгать 3тә балыкка киткән. 4:10 да ул элемтәгә чыгудан туктый.

Урынга килеп җиткән дуслары, балыкчының гәүдәсен көймә янында суда табып ала. Әйтүләренчә, ул моңа кадәр йөрәге авыртуга зарланган булган.

Һәлакәт урынына ГИМСның Түбән Кама бүлеге җитәкчесе Дмитрий Трубин бара. Балыкчы үлеменең сәбәбе — су объектларында куркынычсызлык кагыйдәләрен үтәмәү.

Дмитрий Трубин балыкчыларны, һава шартлары начар булу сәбәпле, штормлы вакытта сулыкларга чыкмаска чакыра. Үзен начар хис иткән очракта су өслегенә чыгудан баш тарту яхшырак.