Түбән Кама районында әбисен кыйнаган ир-атны кулга алдылар

Түбән Кама районында яшәүче кеше әбисен кыйнаган һәм мировой суд тарафыннан 10 тәүлеккә кулга алынган.

Бу хакта Түбән Кама муниципаль районы буенча социаль челтәрдәге 11 нче суд участогы битендә хәбәр ителә.

Эш материалларына караганда, вакыйга быел апрель аенда булган. Ир-ат әбисенең кулына суккан һәм артка каерган. Ачыкланганча, әби кеше үзенең улын — гаепләнүченең әтисен яклаган булган. 

Хатын-кыз оныгына карата гариза язган. Бу хакта РФ Административ хокук бозулар кодексының 6.1.1 маддәсе буенча («Побои») административ эш кузгатылган.