Ял көннәрендә Түбән Каманың 19 автомобиле штрафстоянкага җибәрелгән

Узган ял көннәрендә Түбән Кама дәүләт автоинспекторлары 19 автомобильне штрафстоянкага җибәргән. Бу хакта шәһәрнең Дәүләт автоинспекциясе матбугат хезмәте хәбәр итә.

Шулай ук 19 шофер руль артына исерек хәлдә яки медицина тикшерүеннән баш тарткан өчен тоткарланган. Дүрт шоферның машина йөртү хокукы булмаган.

Моннан тыш, 28 кешегә штраф салынган, алар җәяүлеләр кичүе буенча баручы җәяүлегә юл бирмәгәннәр. Үз чиратында, юл аша чыгу кагыйдәләрен бозган 94 җәяүлегә дә штраф билгеләнгән.

Моннан тыш, ял көннәрендә балаларны махсус утыргычларсыз йөртүнең — 8, пыялаларны тонировкалау кагыйдәләрен бозуның 30 очрагы ачыкланган.