НХЛда уйнаучы Түбән Кама хоккейчысы Сергачев «Нефтехимик» мәктәбе өчен тренажер залы сатып алачак

Түбән Камада туган, «Нефтехимик» хоккей клубы тәрбияләнүчесе, ә хәзерге вакытта «Тампа-Бэй» хоккей клубының Россия яклаучысы Михаил Сергачев «Нефтехимик» балалар һәм яшүсмерләр спорт клубы (ДЮСШ) өчен җиһазлары белән тренажер залы сатып алырга теләве турында сөйләде. Бу хакта Sport 24 хәбәр итә.

Сергачев сүзләренчә, ул хәйриячелек белән күп шөгыльләнүче хоккейчылардан илһам алган һәм туган шәһәре Түбән Кама өчен үзенчә эшләргә карар иткән. Узган сезонда хоккейчылар «Сектор Сергачева» социаль проекты кысаларында «Нефтехимик» аренасын сатып алган иде. Бу елда Сергачев туган шәһәренә кайткач «Нефтехимик» спорт мәктәбендә булып китте.

«Башта без мәктәпкә килдек һәм кәшәкәләр кирәклеген белдек. Бер заводка мөрәҗәгать иттек, ләкин безгә бик зур сумма куйдылар. Таяклар еш ватыла, ә безнең ниндидер даими, перманент әйбер эшлисебез килде. Балачагымда тренажер залы булмавын хәтерлим. «Нефтехимик» директорына хат яздым, һәм ул безгә бина бирәчәген әйтте. Ремонт ясаячакбыз, инвентарь сатып алачакбыз, һәм балалар монда рәхәтләнеп әзерләнә алачак», — дип сөйләде Сергачев.

Исегезгә төшерәбез, узган ел Михаил Сергачев «Тампа» белән сигез елга яңа контракт төзеде. Аның буенча ул 68 миллион доллар эшләячәк. Шулай итеп, спорт матбугаты хәбәр иткәнчә, түбәнкамалы НХЛ тарихында иң кыймәтле Россия яклаучысы булган.