Техника кышка әзер

Җиңү монументы каршындагы мәйданда шәһәрне кышын кардан чистартырга тиешле техника смотры үткәрелде.

Шәһәр башкарма комитеты, торак-коммуналь хуҗалык департаменты, юл хәрәкәте иминлеге дәүләт инспекциясе һәм гадәттән тыш хәлләр идарәсе вәкилләреннән төзелгән комиссия әлеге техниканы карап, кышкы чорда юлларны һәм йорт ишегалларын кардан чистарту өчен мөмкинлекләр җитәрлек, дигән нәтиҗә ясады. Төзекләндерү буенча комплекслы предприятие директоры Дмитрий Филиппов ышандыруынча, кышка әзерлек яхшы: махсус техника җитәрлек, яңасы да алынган, эшләргә кешеләр бар, шәһәр эчендәге юлларны - 36 берәмлек, магистраль юлларны 49 берәмлек техника чистартачак. Әлегә ышанып торыйк, карлар яугач, ничек эшләгәннәрен күрербез инде...