Түбәнкамалыларга тавык ите бәясенең арту сәбәпләрен аңлаттылар

Түбән Кама халкы тавык алудан туктамаган. Әмма элек шәһәр халкы берьюлы тавык та, тавык субпродуктлары да сатып алган булса, хәзер ешрак шуларның берсен генә алырга туры килә.

«Бәяләр күпкә булмаса да, сизелерлек артты», ди шәһәрдә яшәүче ханым. Татарстанстат мәгълүматлары буенча, 2023 елның гыйнварында тавыкның килограммы якынча 152 сум торган. Апрельдә бәя 146 сумга кадәр төшкән. Аннары тавык ите кыйммәтләнә башлаган. Өч ай эчендә аның бәясе 27 процентка арткан. Мәсәлән, Түбән Камада челтәр кибетләренең берсендә чеби-бройлер түшкәсенең килограммы 199 сум тора. Янәшәдә башка продукция — 143 сум. Ә тавык ботларының бәяләре бер килограммы өчен 179 сумнан 230 сумга кадәр.

Татарстан Республикасы Авыл хуҗалыгы һәм азык-төлек министрлыгы белгечләре аңлатуынча, бу продуктка бәяләр арту аның халык тарафыннан кулланылышы арту белән бәйле. Икенче сәбәп — җитештерүчеләрнең йөк ташу проблемалары һәм кыйммәтле ягулык-майлау материаллары аркасында ит ташуга логистик чыгымнары артуда. Моннан тыш, кош ите җитештерүнең үзкыйммәте дә арткан — азык өстәмәләре компонентлары, җиһазлар һәм чыгым материаллары кыйммәтләнгән.