Ел башыннан Түбән Кама районында 7 янгын чыккан

2023 ел башыннан Түбән Камада һәм районда җиде янгын чыккан, аларда ике кеше зыян күргән. Бу хакта Түбән Кама муниципаль районы буенча эшчәнлекне һәм профилактик эшне күзәтү бүлеге хәбәр итә.

Әйтик, Шәңгәлче, Шереметьевка һәм Югары Уратма авылларында мунчалар янган, ә Тынычлык проспектындагы күп катлы йортларның берсендә кухняда янгын чыккан.

Татарстанда 2023 елның биш көнендә барлыгы 44 янгын чыккан, аларда дүрт кеше һәлак булган. Республикада яшәүчеләрдән куркынычсызлык кагыйдәләрен үтәүләрен, электр көнкүреш приборларын һәм газ җиһазларын караусыз калдырмауларын, төзек булмаган яки үзлектән эшләнгән электр приборларыннан файдаланмауларын сорыйлар.