Бер тапкыр гына булса да...

Быел Түбән Кама мәктәпләрендә башлангыч сыйныфларда укучы 15 меңнән артык бала бер тапкыр бушлай ашаячак. 64 сум 75 тиенлек ашка салат, җиләк-җимешләр һәм кайнар аш керә.
Әлегә укучылар көненә бер тапкыр тук-лана, ә инде озынайтылган көн вакытында тагын бер тапкыр ашханәгә барачаклар. Анысы түләүле – 22 сум 75 тиен тора.
– Моңа кадәр тулысынча бушлай ашаган балалар өчен алга таба да берни үзгәрми. Мондый ташламаларга күп балалы, аз керемле гаиләләрдә тәрбияләнүче, ятим балалар ия, – дип аңлатты мәгариф идарәсе начальнигы вазыйфаларын башкаручы Айзирәк Рамазанова.
– Ризык хәләл. Барлык витаминнар да бар, менюны төрләндерәбез, – дип аңлата 2 нче гимназия пешекчесе Ләйсән Сәхәбиева.
Балалар ашлардан канәгать: «Кишердән салат, бәрәңге измәсе, балыктан кәтлит, алма бирделәр, какао да эчтем, бик тәмле булды», «монда һәрвакыт тәмле пешерәләр», – дип, мактау сүзләрен кызганмый алар.
Ашханәдә чиста, савыт-сабаларны юып кына калмыйлар, дезинфекциялиләр дә, дежур балалар да, пешекчеләр дә битлек кигәннәр. Шулай ук, быел өстәл араларының ераклыгы 3-4 метр чамасы булырга тиеш икән.

Фото https://ntr-24.ru/ сайтыннан алынды