Агач сырлый осталар

Күргәзмәдә Түбән Кама осталарының 90 эше куелган. Марсель Хәбибуллин, Азат Нуруллин, Тимергали Мифтахов, Галимҗан Гариповларның эшләре – чын сәнгать әсәрләре. «Уңган кулында ут уйната» дигәндәй, ниләр генә күрмисең монда. Очарга талпынган ябалак дисеңме, ашкынып торган тулпар, ябалдаш мөгезләрен җәйгән поши, Үзәк мәчетебезнең күчермәсе... Куелган эшләрдән күзне алырлык түгел, барысы да искиткеч төгәллек, зәвык белән ясалган. Кызык бит, гади генә агач оста кулына килеп эләккәннән соң, бөтенләй икенче дөньяга эләгә, танымаслык булып үзгәрә. Күргәзмә әле киләсе елның 10 гыйнварына кадәр эшен дәвам итә. Балаларның кышкы каникулларында шәһәребезнең рәссамнары һәм осталары тудырган сәнгать әсәрләре белән танышу өчен менә дигән мөмкинлек бу.
Илһамия ГАФФАРОВА.

Фотолар шәһәребезнең комплекслы музей сайтыннан алынды.