Бүләккә - матурлык

Мин 25нче «Ал чәчәк» балалар бакчасында кече тәрбияче булып эшлим. Күрше Яр Чаллы шәһәрендә туып-үссәм дә, язмыш җилләре мине гүзәл кала - Түбән Камага алып килде. Сөйгән ярым белән гаилә коргач, бер-бер артлы, кыз белән малай алып кайттык. Хәзерге вакытта Иделия белән Марат 25нче балалар бакчасына йөриләр. Балалар белән өйдә утырганда кул эшләре белән шөгыльләнә башладым. Конфетлардан - үзенчәлекле дә, нәфис тә һәм бик тә тәмле дә булган чәчәк бәйләме, органзадан сокландыргыч агачлар, шулай ук, сувенирлар ясап, туганнарыма, дусларыма матурлык бүләк итәм.