Түбән Камадан Луганск балалар йортына гуманитар ярдәм китерделәр

Түбән Камадан абыйлы-энеле Роман һәм Сурен Авдоян, шулай ук «Татарстан гуманитаркасы» төркеме волонтерлары яңа туган сабыйлардан алып дүрт яшькә кадәрге балалар тәрбияләнә торган «Луганск Республика балалар йортына» гуманитар ярдәм күрсәттеләр.

Балалар арасында физик яки психик үсешләрендә кимчелекләре булган ятим сабыйлар бар.

Татарстан волонтерлары аларга кием-салым, азык-төлек, гигиена чаралары алып килгәннәр. Барлыгы Түбән Камадан биш автомобильдән торган колонна китте. Гуманитар йөкне шулай ук МХО сугышчыларына һәм Картлар йортына китерделәр.