Түбән Камада сугыш ветераны Анастасия Грызунова 95 яшьлек юбилеен билгеләп үтте

Түбән Камада яшәүче Анастасия Грызунова — тыл хезмәтчәне, дәһшәтле сугыш еллары шаһиты.

Кичә аны 95 яше белән котладылар. Анастасия Никитичнаның гаиләсе зур: балалары, өч оныгы һәм 5 оныкчыгы бар.

Сугыш башланганда, Анастасия Никитична Тәтеш районының Урюм авылында яши. Ул вакытта аңа 12 яшь була. Басуда, фермаларда эшли, сугышчылар өчен кием дә тегә. 1964 елда ире белән алар әле яңа гына барлыкка килгән Түбән Камага килеп төпләнәләр. 30 ел ул тубдиспансерда шәфкать туташы булып эшли.

«Мин һәрвакыт әбием белән горурландым. Без барыбыз да озын гомерле әбиебезгә охшарга тырышабыз. Аның сүзләренчә, озак яшәүнең сере — спорт белән шөгыльләнүдә, дөрес туклануда һәм эштән курыкмауда», — дип уртаклашты өлкән оныгы Алексей Сергеев.