Түбән Камада җомга көнне мәчет янында диспансеризация үтәргә мөмкин булачак

Җомга, 16 августта, Түбән Кама үзәк мәчете территориясендә диспансеризация кысаларында медицина тикшерүе узачак.

Бу юлы түбәнкамалыларны иртәрәк, иртәнге 8дән кабул итә башлыйлар. 14:00 гә кадәр барлык теләүчеләр буй, авырлык, кан басымын үлчәтә, ЭКГ, флюорография ясата, анализга кан тапшыра, маммография уза алачак. Хатын-кызларны һәм ир-атларны төрле палаткаларда карыйлар.

«Җәмигъ» мәчете янында һәр җомга саен күчмә диспансеризация үткәрелә.

Шулай ук Түбән Камада диспансерлаштыруны 1 һәм 2 нче поликлиникаларда, клиник-диагностика үзәгендә узарга мөмкин. Соңгы 7 айда аны 41 мең түбәнкамалы тикшерелгән.