Түбән Камада йөкле хатыннарның 23,6 проценты табиблар консультациясеннән соң аборттан баш тарткан

Быел Түбән Камада йөклелекне ясалма туктатырга ниятләгән хатын-кызларның 23,6 проценты консультациядән соң аборттан баш тарткан. Эшлекле киңәшмәдә әлеге саннар белән перинаталь үзәкле шәһәр балалар хастаханәсенең баш табибы Алексей Толстиков таныштырды.

Җитәкче сүзләренчә, хатын-кызлар консультациясендә авыр тормыш хәлендә калган йөкле хатыннарга консультатив ярдәм күрсәтә торган кризис үзәге эшли. Төп юнәлеше — абортларны профилактикалау буенча чаралар.

Төп бурыч — йөкле хатынны тулы медицина-психологик реабилитацияләү һәм җәмгыятьтә, гаиләдә адаптацияләү өчен кирәкле шартлар булдыру. Хәзер йөклелекне ясалма рәвештә туктатырга ниятләгән барлык хатын-кызлар психологик консультация үтә.

2023 елның беренче 8 аенда 466 пациент аборт сорап мөрәҗәгать иткән, шуларның 110ы фикерен үзгәрткән. 2022 елда фикерләрен үзгәртүчеләр — 17,2 %, бер ел элек — 24,9 %, 2020 ел нәтиҗәләре буенча 23,1 % булган.