Түбән Камада яңа скверда Менделеев һәйкәле барлыкка киләчәк

Түбән Кама мэры Рамил Муллин проектлаучылар белән төзелә торган Менделеев исемендәге сквер планын тикшерде, аның озынлыгы 300 метр чамасы (Шинчылар проспектыннан Бызов урамындагы 1 нче йортка кадәр).

Мәсәлән, шәһәр башлыгы Менделеев урамындагы 32 нче йортның ике аркасын да машиналарга керү һәм чыгу өчен ябарга һәм аларны янгын сүндерү юллары буларак кына калдырырга тәкъдим итте.

Бу — булачак парк чираттагы парковкага әйләнмәсен өчен тәкъдим ителә.

Очрашуның төп мәсьәләләренең берсе — Дмитрий Менделеев һәйкәлен урнаштыру. Ул һәркем күрерлек урында һәм төрле чаралар үткәрергә мөмкин булган киң мәйданчык каршында урнашырга тиеш.

Һәйкәлне Менделеев урамындагы иске корылма урынында урнаштырырга карар ителде. Дистә еллар дәвамында анда кибетләр, алкомаркет һәм офис биналары урнашкан. Соңгы тапкыр монда автомәктәп булган. Хәзер ул күченде, ә бинаны сатып алдылар һәм сүтәчәкләр. Дмитрий Иванович Менделеев һәйкәле нәкъ менә шушы урында барлыкка киләчәк.

Ә менә Менделеев урамындагы 32 нче йорт артындагы юл мэр тәкъдиме буенча велосипед юлы булачак. Шулай ук сквер төрле спорт мәйданчыклары, ял итү зоналары белән тулыланачак.

Сквер астында суүткәргеч челтәре үтә — бу да исәпкә алыначак, аны хезмәтләндерү өчен техник зона калдырыла. Эшләр уңайлы шәһәр мохитен формалаштыру буенча илкүләм проект кысаларында үткәрелә. Төзелеш бәясе 70 миллион сум.