Түбән Камада Бөтенроссия эшкә урнаштыру ярминкәсе булды

Түбән Камада яшәүчеләр «Демография» илкүләм проекты кысаларында уздырыла торган Бөтенроссия эшкә урнашу ярминкәсендә гади жгут җыярга һәм виртуаль чынбарлык шлемы белән эшкә чумарга тырышты. Бу хакта Түбән Кама муниципаль районы рәсми сайтында хәбәр ителә.

Ярминкә сәнәгатьнең төрле тармакларыннан — кече һәм урта бизнестан алып эре предприятиеләргә кадәр эш бирүчеләрне һәм эш эзләүчеләрне берләштерә. Чарага Түбән Кама студентлары эшкә урнашу мөмкинлекләре белән шәхсән танышу өчен килде.

«Монда шәһәрнең нинди предприятиеләре эш тәкъдим итүен күрү өчен уникаль мөмкинлек бар. Сезнең дөрес юл сайлавыгызны, беренче эш урынында үзегезне яхшы күрсәтүегезне теләр идек», — дип мөрәҗәгать итте студентларга Түбән Кама муниципаль районы Башкарма комитетының яшьләр эшләре идарәсе башлыгы Фәрит Шәяхмәтов.

Ярминкәдә күп кенә мәйданчыклар тәкъдим ителде, анда теләгән һәркем берьюлы берничә эш бирүче белән әңгәмә уза, карьера үсеше мөмкинлекләре һәм яңадан укыту программалары турында белә, резюме төзергә өйрәнә, һөнәри юнәлеш тесты үтә, халыкны эш белән тәэмин итү үзәге белгечләреннән консультация ала һәм мастер-классларда катнаша алды.

Түбән Кама һәм район предприятиеләре ярминкәдә 800дән артык вакансия тәкъдим итте. Аларның күбесе эш эзләүчеләр өчен интерактив мәйданчыклар һәм күргәзмәләр әзерләгән.