Түбән Камада 10 декабрьдә шәһәр советына өстәмә сайлаулар узачак

10 декабрьдә 7 нче Чабьинская бер мандатлы сайлау округы буенча дүртенче чакырылыш Түбән Кама шәһәр Советы депутатына өстәмә сайлаулар узачак. Җәй көне мандаттан Сергей Олюнин баш тарткан иде. ГАС «Выборы» мәгълүматлары буенча, үз кандидатураларын өч кеше тәкъдим иткән.

«Бердәм Россия» дән «ТАИФ-НК» генераль директорының гомуми мәсьәләләр буенча 50 яшьлек ярдәмчесе Владимир Гатунок тәкъдим ителде.

«Россия коммунистлары» мандатына «Никопрофснаб» ҖЧҖ директоры Николай Колосов дәгъва итә, аңа 49 яшь.

Шулай ук үз кандидатурасын Дәүләт Думасы депутатының 47 яшьлек ярдәмчесе Владимир Сурчилов (ЛДПР) тәкъдим итте.

7 нче Чабьинская сайлау округына Гагарин, Чабьинская, Спортивная, Менделеев урамнары һәм Вахитов проспекты буенча берничә торак йорт керә — якынча 13 мең сайлаучы.

Бердәм тавыш бирү көнендә, 10 декабрьдә, Татарстанның 15 районында җирле үзидарә вәкиллекле органнары депутатларына өстәмә сайлау узачак.