Сез дә әзерләп карагыз

Хәзер бакчаларда үскән уңыштан кышкы чорга салатлар ясый торган вакыт. Үзем әзерли торган берничәсенең рецептын «Туган як»ны укучылар белән дә уртаклашырга булдым.

1,5 баклажанны 5 мм калынлыкта түгәрәкләп кисәргә дә, кәстрүлгә салырга. Өстенә тоз сибеп, сәгать-сәгать ярым тотарга. Саркыган әче суын түгеп, баклажаннарны салкын су белән чайкатасың, шуннан соң гына салатка саласың.

Бу салат өчен тагын 1,5 килограмм помидорны иттарткычтан чыгарырга, 5 болгар борычын вак кына турарга. 200 грамм шикәр комы, 200 грамм сыек май, 3 аш кашыгы тоз, соңыннан 1 баш сарымсак сытып - барысын бергә 20 минут кайнатырга һәм банкаларга салып ябарга. Әче салатлар яратучылар 1-2 әче борыч сала ала.

Без кызыл чөгендерне күп утыртабыз, үстерәбез, ә күп очракта пешереп ашарга иренәбез. Мин кабачки икрасын чөгендер белән ясарга булдым. Моның өчен 3 килограмм чөгендер (кабачок булса да шул кадәр үк), ярты килограмм суганны иттарткычтан чыгарасы. Тагын 1 стакан сыек май, ярты стакан шикәр комы, 3 аш кашыгы тоз, ярты литр томат пастасы, ярты чәй кашыгы төйгән кара борыч, 0,25 литр майонез кирәк булачак. Башта чөгендерне 1 стакан сыек май салып ярты сәгать кайнатырга. Аннан соң башка ингредиентларны да салып, тагын 1 сәгать пешерергә. Кайнар килеш банкаларга тутырып ябарга. Бик тәмле була.

2 килограмм чөгендерне иттарткычтан чыгарып, 1 стакан сыек май салып 40 минут кайнатырга. Кабат 3 килограмм помидорны шулай ук иттарткычтан чыгарып, чөгендергә кушарга да, тагын 20 минут кайнатырга. 6 болгар борычы, 1 әче борычны да иттарткычтан чыгарып, салатка өстәргә дә, 10 минут кайнатырга.

1 стакан изелгән сарымсак, 5 чәй кашыгы тоз салып, 10 минут кайнатырга һәм банкаларга тутырып куярга. Чөгендер исәбенә салатка шикәр салырга кирәкми, әче дә булмый.

Нәҗибә ФӘРЕТДИНОВА, пенсионер.

Түбән Кама шәһәре.