Түбән Камадан 86 яшьлек җырчы Нур Мусин халыкара конкурс лауреаты булды

Түбәнкамалы Нур Мусин «Халык җәүһәрләре» халыкара милли-мәдәни фестивале лауреаты булды.

Конкурсның Гала-концерты Казанда узды. Фестивальдә катнашучыларның барысы да үзешчән артистлар. Алар арасында Россия, Төркия, Кытай, Азәрбайҗан, Казахстан һәм Үзбәкстан җырчылары да бар иде.

Нур Мусин гомере буе физкультура укытучысы булып эшли, җырлаудан туктамый, ә лаеклы ялга чыккач, ул үзен тулысынча иҗатка багышлый. Бүген ул — «Талир тәңкә» фольклор ансамбленең иң өлкән катнашучысы.

Ансамбльнең башка катнашучылары белән бергә Нур Мусин җыр культурасын, халык иҗатын саклау һәм үстерү эшен дәвам итә. Бүген артистлар Җиңү көнен бәйрәм итүгә актив әзерләнә.