Түбән Кама табиблары 60 яшьлек профессиональ биюченең умрау сөягенә катлаулы операция ясаганнар

Түбән Кама үзәк район хастаханәсенең травматология бүлеге табиблары Димитровградтан килгән 60 яшьлек профессиональ биючегә пластика элементлары белән катлаулы операция үткәргәннәр. Бу хакта хастаханәнең матбугат хезмәте хәбәр итә.

Профессиональ биюче, 60 яшьлек Лариса Анатольевна Капустина, хәзер тулы күкрәк белән сулый ала. Чаңгыда шуганда егылганнан соң, Ульяновск өлкәсендә яшәүче хатын-кызны ике ел уң умрау сөягенең күкрәк очы ябык каймыгуы җәфалый. Мондый каймыгулар, травматологлар әйтүенчә, бик сирәк очрый, күкрәк сөяге белән умрау сөяге тоташкан урында күкрәк очы чыккан. Сөяк чыгып тора һәм пациентка авырту һәм эстетик уңайсызлык китерә, чөнки ул гамәлдә иягенә тиеп тора.

Үзәк район хастаханәсенең травматология бүлеге табибларына пластика элементлары белән катлаулы операция ясарга туры килә. Эшкә тәҗрибәле хирурглар — травматология бүлеге мөдире Виктор Сизинцев һәм травматолог-ортопедлар Марат Магомедов һәм Булат Сатдаров тотына.

Операция 2 сәгать 20 минут дәвам итә һәм берничә этапта уза.

Тагын бер мөһим этап — умрау сөягендә таушалган кимерчәк катламын алганнан соң, сөякнең бу өлешен алыштыру. Моның өчен травматологлар пластика операциясе ясаганнар: алар пациентның янбаш сөяге өлешеннән яхшы кан белән тәэмин ителә торган көпшәк сөяген алганнар, һәм аның белән сөяк дефектын алмаштырганнар.

Хәзер Лариса Анатольевна үзен яхшы хис итә. Ул инде тизрәк сәхнәгә кайтырга һәм яраткан гавай биюләрен биергә хыяллана.

«Димитровградта мондый операцияләр ясамыйлар. Виктор Владимирович Сизинцев турында миңа безнең табиб-травматолог сөйләде, ул элек Түбән Камада эшләгән иде, һәм мин сезнең шәһәргә операциягә килдем. Мин бик рәхмәтле, сезнең хастахәнә искиткеч. Монда барысы да үз эшләрен белә, табиблар да, шәфкать туташлары да, санитарлар да булдыралар. Барысы да бик игътибарлы. Сезнең шундый хастаханәгез, шундый табибларыгыз булу үзе бер бәхет. Барыгызга да нык сәламәтлек телим!», — ди Лариса Анатольевна.