Түбән Камада спорт

Түбән Кама лаеклы рәвештә Татарстанның спорт башкаласы булып санала. Бүген биредә берничә стадион, манеж, физкультура-сәламәтләндерү комплекслары эшли. Сүз уңаеннан, Татарстанда беренче ябык җиңел атлетика манежы булган Спорт сарае нәкъ менә Түбән Камада 1982 елда барлыкка килә. Ул вакытта ул «Юбилейный» дип атала, ә соңрак «Шинник» дип үзгәртелә. Россия дәрәҗәсендә Түбән Каманы «Нефтехимик» профессиональ футбол һәм хоккей командалары тәкъдим итә.

Хоккейчылар Континенталь хоккей лигасында уйный. «Нефтехимик» хоккей клубына 1968 елда нигез салына. Футболчылар беренче лигада чыгыш ясый. Клуб шәһәрдә хоккейдан күпкә соңрак — 1991 елда барлыкка килә. Тагын «Реактор» хоккей клубы бар (2009 елда «Нефтехимик-2» фарм-клубы базасында оешкан: ул Яшьләр хоккей лигасында катнаша).

Түбән Каманың «Шинник» футбол клубы — һәвәскәр клуб. Аның уенчылары футбол буенча шәһәр һәм республика ярышларында күп тапкырлар җиңү яулый. 2009 елда клуб футбол буенча Татарстан Республикасы Кубогын ота. Команда өч тапкыр Татарстан чемпионы исемен алуга ирешә. 2004 елда шәһәрдә тагын бер һәвәскәр команда — «Академик» клубы барлыкка килә. Ул Татарстан Республикасы беренчелегенең беренче лигасында чыгыш ясый, ә спортчыларны «Нефтехимик» футбол клубының төп остазларының берсе Владимир Морозов өйрәтә. Түбән Каманың җиңел атлетика спортчылары, көрәшчеләр, боксчылар һәм спортның башка төрләре вәкилләре дә лаеклы чыгыш ясый.

Түбән Камада спорт ярышлары шәһәр төзелеше башлану белән бер үк вакытта үткәрелә башлый. Шул вакытта ук һәвәскәр командалар, спорт секцияләре оеша, спорт объектлары төзелешенә керешәләр. Беренче хоккей кортлары, стадионнар һәм спорт белән шөгыльләнү мәйданчыклары барлыкка килә. Шәһәрнең «Нижнекамскнефтехим» предприятиесендә җитештерү берләшмәсенең физик культура клубы эшли башлый. Соңрак, 1978 елда, ул «Нефтехимик» спорт клубы дип атала.

Хәзерге вакытта Түбән Камада иң массакүләм спорт төрләре: футбол, хоккей, баскетбол, грек-рим һәм ирекле көрәш, шулай ук җиңел атлетика, көнчыгыш көрәшләре, чаңгы ярышлары.

Түбән Камада бүгенге көндә дүрт футбол стадионы бар, аларның икесе — ясалма өслекле. Моннан тыш, 2 боз спорт сарае: аларның берсе 2,5 мең кешене сыйдыра, ә икенчесе — «Нефтехимик» спорт-мәдәни комплексы 5,5 мең кешегә исәпләнгән.

Түбән Камада шулай ук 4 ябык физкультура комплексы эшли. Шәһәрдән читтә, мәйдан янында, ел саен милли бәйрәм — Сабантуй үткәрелә торган урында, ипподромы һәм автоспорт трассасы булган «Ильинка» мәдәни-спорт комплексы урнашкан. 2024 елда Түбән Камада «Дружба» спорт-сәламәтләндерү комплексы базасында төзелгән «СИБУР Арена НК» күп функцияле спорт үзәге ачылды.

Красный Ключ поселогы янында 2005 елда ачылган «Актай» ат спорты мәктәбе урнашкан. Шәһәр яны урманнарында яктыртылган трассалы «Корабельная роща» һәм «Алмаш» чаңгы базалары урнашкан.

Түбән Камада һәм Түбән Кама районында физкультура һәм спорт өлкәсендәге эшчәнлекне Түбән Кама муниципаль районы башкарма комитетының Физик культура һәм спорт идарәсе координацияли һәм оештыра. Бу структура белән Алексей Урезов җитәкчелек итә.